وشرد اگول..

موضوع: وشرد اگول.. الأربعاء يوليو 29, 2009 11:02 am

بحسنك انه
شريد احجي
وشرد اگول..؟
جن الليالي تتوسلك
اتصير گمرها
وتلم انجومها
وتحطهن ابجفك
وتوگفلك محنايات
الشموسنه التجي
وتفرهد كل جمالك
احتارن النهران بيك
جه لنك عسل
تگطر من اولك لتاليك
وبين راعشات النهد
نامن افصول
من الجفافي
وخضرن ابساتين
من الترافة
وشاغت الروح
بنهر نهدك
جيت اضوگك
حرت شلون
تنضاك
گبل ميضوگك التين
والتمر
جانن خشب
وشكثر جانن حنظل
وبس مر طعمك عليهن
صارن حلوات
اخذني بكل مشتهاتك
اتيه انه ابحلاتك
جن هلاهل الضحكة
والمعاضد ينگطن شذر
وانته النوم
ومشتهه وحلم
امطرز ليلو
لو عرس مشتاك
گلت اجيسك
جست جفي وفرفحت
ثاريك وي النبض
تسري
واعرفت جن النوم
يشتهيك اتصيرله حلم
والحلم لشوفتك
يشتاگ
وبنهيد الترافة
ألم البرحي
وهو واگف
مثل نمره
تتگامز امگامز
علي وتنافرني
واشوغ
بتفيفحيك
ياحلم طرزته بعيون
عمري
تيهني بزواياك
ودوخ الروح بحلاتك
وانته مو مثل الناس
من تعرگ نلم المسج
ونحطه روايح بالاعراس
ونبخر المحسود
بعرگ نهدك
لاتظن خصر عندك
عنگ امراية خصرك
من تلف روحك
تلف الكون وياك
وبمشيتك ارتجف كلي واطيح
ترگص امراگص
خطوتك
وانه لوحدي اتمايل
جنها الگاع روحي
ترگص
واشبگك حيل
واگلك ياحلاتك..

الفجر
12/07/2009
الع ـ عقيل ـراقي