قصيدة يالموعود

يالموعود يمته اتعود علينه طالت الغيبه

علينه طالت الغيبه وغيابك تره اثر
تدري اشعملت اشسوت كوم اهل الرده والشر
تدري جيوش امريكا بأرضنه هاي هالتفتر
ظلم وجور يامنصور ومصيبتنه تره امصيبه

مصيبتنه مصيبه شاب منها الراس
مدري اشعملت الاشرار واتغيرت نفوس الناس
عماهه وذلهه هالدولار وبيه اتغيرت الانفاس
ياستار امن الدولار خله الوادم ابريبه

يغالي طول غيابك وعلينه طالت المده
وكل اليوم اليمر مولاي تلفينه الف شده
وصبرنه فاض يالغالي واضنه هم جزه حده
تمر أيام كلهه الآم طفلنه اليرضع اتشيبه

تشيب اطفالنه مولاي من جور اليمر بينه
من حكم الطغاة اسنين تدري بالسده اعلينه
ننتظرك نعد ايام يالغايب يوالينه
صار اسنين منتظرين اخبارك بأرض طيبه

صار اسنين منتظرين يالمهدي ونعد ايام
تدري اشعملت اشسوت طغاة الجور والظلام
جماله جيوش هالكفار اجتنه والسبب صدام
جمع ارهاب وكطع اركاب يغالي الراح شيجيبه

شيجيبه يغالي السوم وجت وانطفت البيوت
واحبابك تعاني دوم طاغوت بأثر طاغوت
واليحكم علينه شلون تدري بيه اكبر حوت
شعبنه شلون للملعون كون ولازم يهيبه

يهيبه شلون يالمهدي وانته لهالوكت مذخور
احنه وياك ايد بأيد بيايوم الوعد وتثور
ناخذ ثار كل مظلوم وثار اللي بكه منحور
يمته تثور يامنصور حقنه لازم انجيبه

( هذه القصيده ايضالوالدتي الغاليه الشاعره المقعده ام سيد زمن التي لقبها شهيدنا الصدر(شاعرة الحسجه)